加義2:0摘“星”
【本報消息】本地甲組足球聯賽昨晚八時在蓮峰球場上演獨腳戲，加義鬥台星。加義憑上半場連入兩粒，二比○擊敗升班馬台星重返勝軌。
加義上輪不敵澳科鄒北記，第四輪鬥升班馬台星，實力佔優的加義開賽已搶得主動權，早段先有保迪路頭鎚中楣，但不斷搶攻下，廿三分鐘蘇卓謙接應祖利亞傳中壓入禁區勁射成一比○。落後的台星之後收壞消息，主力林偉祥三十分鐘因傷退下火線。保迪路兩分鐘後博得極刑，列比路操刀主射中鵠，加義半場領先兩球。
台星換邊後積極反撲，張子謙禁區邊勁射高出。尾段攻勢不斷的台星機會不少，何嘉祺、周洋等先後攻門，惜同樣錯失機會。最終加義成功頂住台星攻勢，保住半場優勢贏二比○。加義開季四戰兩勝兩負，比賓菲加踢多一場，暫以兩分優勢升上前四。開季三連敗的台星，得失球不及士砵亭暫排榜尾。